خدایا ! میں تجھ سے نا امید نہیں ہوں کہ تو نے توبہ کا دروازہ ہم پر کھلا رکھا ہے ۔
میں اس ذلیل بندہ کی طرح بات کر رہا ہوں جس نے اپنی ذات پر ظلم کیا ہے اور اپنے پروردگار کی حرمت کا پاس نہ رکھا ہو ۔
جس کے گناہ بہت زیادہ ہیں اور اس کی زندگی رو بہ زوال ہے ۔
جس وقت اس کی آنکھ کھلی تو عمل کا وقت گزر چکا ہے اور عمر کے آخری ایام آپہنچے ہیں ۔
۔۔۔ وہ گناہگار گریہ و زاری کرتے ہوئے تیری بارگاہ میں آیا ہے اور تیرے سامنے بصد خلوص توبہ کر رہا ہے ، پاک دل کے ساتھ تیرے سامنے کھڑا ہے اور آہ و فریاد اور حزین آواز کے ساتھ تجھے پکار رہا ہے ۔
تیرے خوف کی شدت سے اس کے پاؤں لرز رہے ہیں اور آنسووں سے اس کے رخسار تر ہیں ۔
اور یا ارحم الراحمین کہہ کر تجھے پکار رہا ہے ۔
(امام سجاد علیہ السلام کی مناجات کے کلمات ، صحیفہ سجادیہ، دعا/۶۶)
دلچسپ حکایت
ایک شخص امام سجاد علیہ السلام کی خدمت میں شرفیاب ہوا ، امام نے اس سے خیریت پوچھی اس نے کہا ، میری صبح اس حالت میں ہوئی کہ میں چار سو دینار کا مقروض ہوں اور اس کی ادائگی کی قدرت نہیں رکھتا ہوں ، کثیر العیال ہوں اور ان کا نفقہ میری توان سے باہر ہے ۔
امام سجاد علیہ السلام اس آدمی کی مشکل سن کر بہت غمگین ہوئے اور بہت روئے ، آپ سے پوچھا گیا :کیا آپ کا گریہ اس کی مشکلات و مصائب کی وجہ سے نہیں تھا ؟
فرمایا : بیشک! ایسا ہی ہے ، اس سے بڑی مصیبت کیا ہوگی کہ ایک صاحب ایمان اپنے برادر مومن کو فقیر و ہاتھ خالی دیکھے لیکن اس کی مشکلات کو برطرف نہ کر سکتا ہو۔
پھر اسے آدمی کو دو روٹی دی اور فرمایا : اس دو روٹی کے سوا میرے پاس اور کچھ نہیں ہے ، خداوند اسی دو روٹی کے ذریعہ تمہاری زندگی میں وسعت عطا کرے گا ۔
وہ آدمی روٹی لے کر گریہ کناں بازار کی طرف گیا ، راستے میں ایک مچھلی بیچنے والا اس کے پاس آیا اور کہنے لگا : یہ تازہ مچھلی ایک سوکھی روٹی کے بدلے لے لو ۔
اس آدمی نے مچھلی لے لی اور اسے ایک روٹی دے دی ، تھوڑی دور چلا تھا کہ ایک نمک بیچنے والا ملا اس نے کہا : یہ ناچیز نمک ہم سے لے لو اور ہمیں ایک روٹی دے دو ۔
اس آدمی نے ایک روٹی دے کر اس سے نمک لے لیا اور نمک اور مچھلی لے کر گھر آگیا ۔
گھر میں جب اس نے مچھلی کا پیٹ چیرا تو اس میں سے دو موتی نکلے ، یہ دیکھتے ہی وہ آدمی سجدہ شکر بجا لایا ۔ پھر اس آدمی نے دونوں موتی مہنگے داموں میں بیچ کر اس سے حاصل ہونے والی ثروت سے اپنی زندگی کو سر و سامان بخشا ۔
(مناقب ابن شہر آشوب ، ج/۴،ص/ ۱۴۶)
ابو حمزہ ثمالی امام سجاد علیہ السلام سے نقل کرتے ہیں کہ آپ نے فرمایا :
ما مِن قَطرَةٍ اَحَبُّ إِلَي الله عزوجل مِن قَطرَتَينِ قَطرَه دَم في سبيل الله و قَطره دَمعِهِ في سَوادِ اللَّيلِ لا يُريدُ بِها العَبدُ الاّ اللهَ عَزّوجلّ
ترجمہ : کوئی بھی قطرہ خدا کے نزدیک دو قطروں سے زیادہ محبوب نہیں ہے ، ایک وہ خون کا قطرہ جو راہ خدا میں گرے اور دوسرا اشک کا وہ قطرہ جو رات کی تاریکی میں بندے کی آنکھوں سے خدا کے لئے نکلتا ہے ۔
(بحار الانوار ، ج/۱۰۰، ص/۱۰)
Tags: